Wiberhoge

Vor 3 Jahr und 4 Täg häts Telefon glütet. „Sid ihr d Franziska?“

„ESAF 2019“ seit Euch das öppis?“

„Hmm jo aso .... Schwingfäscht oder?“

„Genou... und mer wöttä Euches  Huuus miete. Mer si dä Bärner Verband. 

„Ja so wiit voruus... ? Das mues i mer no überlege.“

„Heit ihr öppe ä Wartelischte?“ Dä wäred mer derbii. Aber scho guet; mer bliibe im Kontakt. Mer si schpannt, wiä ihr Stätter das Fäscht zämebringet. Ihr heit meini kei Ahnig do in Zug gället, vo Schwinge. U dä no öppis: Chömed jo nöd im Dirndl. Mer si do nöd in Öschterrich.“

Genau i dem Momänt hanni begriffe.... „Das isch än ernschti Sach, das Schwinge.

Das Huuscasting hät denn schliesslich 

Nordoschtschwiiz gwunne und so sind am 22. August Winterthur und Urnäsch izoge. 

I ha mi gründlich vorbereitet. Jedi Zytig isch voll gxi mit Tipps, Erklärige und Benimmregle. Als Guetnachgschichtli häts Gamme, Schlungg, Brienzer und Fuessstich ghä.

Und ächli Infos und Tratsch über diä 276 Böse.

Wiä mänge Zuger bin ich mit enere Füehrig zur Arena pilgeret und ha das Werk bewunderet und ha auch schnell begriffe, dass nöd 56‘000 tuusig Lüüt söttid glichzitig ufstah bim Juble. Äs Wunderwerk: Das Gestänge!

Nach dem Telefon vor 3 Johr hanni natürli grad wellä punkte bi mine

Bsuecher und has si urchig empfange. Wiberhoge-Apéro mit Kolin-Cüpli, Chranzer-Shot und Chäs vom Berg. 

„Uf äs guets Fäscht!“

Und au mit minere Alegi sinds zfriede gxi. Mini Bluse sig dä Hit. Rosa statt blau und spezielle Chrage.

„Bisch debii!“ (das heisst akzeptiert).

Dä Obig isch no lang worde. D Appezöller hönd afo Zoierle und ich weiss jetzt au, wer dä „Hegi“ isch. Er isch uf 10  Jodelstrophe hanget, agschwolle und gschtige und so erotisch wiä

dä Obig usklungä isch, so hät der Morge unerwartet ähnlich aknüpft. 

I mach mi uf  zum Umzug. D Vorbereitige sind a jedem Egge im Gang. Do gxehn i das uf em untere Poschtplatz. Das bruucht kei Wort. I mues eifach schmunzle.

Damit jedes Rind glänzt und strahlt gohts  no ad Intimpfläg. Meterwiis Klosettpapier. Erscht dänn chunt dä Schmuck. Aber au nümm wiä früener. Blueme sind us Plastik.

Ich mues wiiter. Tubas vo dä Baarer mached grad no Pause. 

Beresina Grenadier richtet ihri rotä Fäderebüsch. 

Am Landgmeindsplatz isch alles parat. Fahne, Fahne, Reedä. Dänn marschiert d Fahne vom Eidgen. Schwingerverband i. Üsi Conpatriots de Estavayer sind sichtlich stolz. Flankiert vo ihrne Ehredame. Hinder mir im Publikum: 

„Lueged mal diä Trachte a vo denä! Da sind üsi scho vill schönner!! und üsi Meitschi au!“ Also ich find diä rote Röck no frisch vo dä Wälsche. Lömmer das. Dä Tännler Heinz isch dra. Und er stolperet fascht über sis allerletschti Hindernis vo dem ganze Mammutalass. D Stäge zum Rednerpult. Er fangt sich grad no uf. „

„Ich stohne no!!“Applaus und Gelächter!

Ab jetzt gahts wie am Schnüerli. A knackigi Red dänn Marsch zum Umzug. 

Vorallem mini „Ohlala Rinder“ gänd jetzt Gas. D Sennä müend mit ganzen Gwicht gägestühre. Nöd ganz ungföhrlich und ich äuge scho mal nach Fluchtwäg.

Fahne und Trichler gänd äs luuts und bunts Bild. 

Greth Schäll und d Nüssler tanzed. 

Als Symbol für üsi Mulitikultistadt swingt denn no diä Dame. 

Am Abig lockts mich ufs Fäschtgländ. Zerscht mal is Pulverhüsli. Grössä Dank a Korporation Zug. 

Gmüetlich. Bi Hoselupfbier,

Wurscht und Nussgipfel

fühled mer üsi Gmeinschaft. A grossartigi Idee.

I dä Zält isch es Stungg 

und im Gemsstock wirds denn huuteng. 

D Francine rockt uf dä Bühni. Toll aber nöd so min Stil... ä chli brav. 

Also usä und los is Königshuus. Für mich diä bescht Beiz. Vom Giebel hänked alti Chränz. 

D Könige in Schwarz-Wyss Poster. Da mues no es Schwinger-Kaffi herä.

Zum Schluss no Lichtdrumms und Sound bi Robin Tune bi dä V-ZUG Arena.

Und jetzt isch es sowiit. Ich bin i dä Arena. Sunntig. Ich darf mit dä Kantonalbank das Spektakel gnüsse.

 D Sunne gaht uf. Spieglet sich im

Zuger Banner. Äs guets Omen?

Hmmm nei...dä Richmuth chan nümm. 

Aber Zentralschwiiz hät no einigi Pfyl im Köcher. Scho bin i uf mim Platz. Nüt da gmüetlich. Ich bi voll gforderet. 7 Ring. Söttsch überall uf em Laufende bliibe. Dä Schurtebärger griift grad mit siim Gägner uf Platz 4. Läck dä Fetzä. Sis blaue Edelwisshämli wird am Rugge dunkel. Schweiss triibt dur dä Stoff. Gsichter verzient sich zuä Fratze! Zömebisse... Schmärz... wildi Chraft...Glichzytig wirblet dä Gnägi Florian mit em Schuler Ramon. Wissi Hosebei lueget gäg dä Himmel. Dä Lutsprecher rüeft witeri Schwinger uf dä Platz. Danebed präsentiert sich grad d Jodlergruppe Ägerital. I dem allem muesch drus cho. Es git kei Azeige für Note.

Das weisch doch: Wenn eine muess drücke gits nur 9.75. Zum Glück wüssed dä Eichenberger Samuel und dä  Frigo Manuel vo dä KB Details. „Jetzt Achtung. Mached euch parat: Dä Wicki chunt!!

Oh nei ... äs goht gäge dä Schneider Domenic. Dä mit sim Wasser-Ritual am Brunne. Er sprützt und schlat mit dä Händ fescht a Chopf. Ich find dä au sympatisch. Aber dä Wicki isch halt „Üse“. Dä Schneider rollt mit 140kg Läbendgwicht in Ring. Wicki 10 Sekunde. Ein Schwung. Dä Domenic isch platt. Sagehaft dä Wicki-Quicki!

Jetzt Achtung:

Wälle!!!! Sitze bliibe. Ärm füre, Finger flattere loh. Dä Wicki risst sini Ärm id Höchi. Und jetzt 15’000 Zueschauer uf dä ISV Tribüni: Hoch, hoch, hoch. Jeäh... Jeäh ... Jeäh. Sekunda später leit dä Bieri Marcel sin Widersacher is Mähl. Scho wieder en Erfolg für üs. Hoch.. hoch... hoch ...Jeöh .. Jeöh ... Jeöh!!!

Das macht Durscht. Dä Sämi löscht gleitig mit Wisswy und bald zirkuliert äs Brättli mit Chäs und Salsiz. 

So guet...“KB .... wir begleiten Sie im Leben.... „und auf der Tribüne!“

Danke! Aber jetzt nur nöd in Schongang schalte. 

Dä Murer Ueli, Dä Tännler Heinz, tuusig Sänger und Tänzer.  56000 singet s Buurebüebli... vo Luzern göge Wäggis zue...Ändlich: Fahne ghört üs. D‘ Büezerbuebe röhret „Ma gäge Ma“. Dä Gölä, dä 

Traufer und über allem: „Ä Schwan so wiiss wiä Schnee!“ 

Roti Fahne, gälbi Fahne, eis Gewädel... Alphornkläng. 

Nach em Zmittag gits nur eis Thema. D Iteilig. Wer gäge wär? Chöpf sind tüüf über dä Lischte.

Äs isch klar. Es lauft für dä Stucki und dä Wicki. Dä Richmuth wär jetzt im Allzythöch. Numme 10 i. Aber es langet nüm. Dä Orlik Armon isch au usbremst. 

Im Ring wird jetzt um Chränz gschwunge. So nöch am Ziel. Männe gähnd alls. Sagmähl kläbt i dä Gsichter, Enttüschig, wenn am Rugge putzt wirsch. 

S Publikum a dä Sunne wird glichzitig grilliert. „Hopp hopp möched! So heiss do.“

Am Viertel vor Füfi chasch d Luft im Stadion abschniede. Es isch Zyt; Kameras in Position: Feldstecher uf Ring 7. 

Da Wicki Joel bliibt lang am

Brunne. 1000 Zooms uf ihm. Aber ER stoht scho im Ring. Dä Torro Stucki im rote Hömli. 150 kg x 1,92 m. Häsch dä Blick gseh, diä Haltig.

Wenns für en Entschluss äs Bild gäb... das isch es. 

Mer kännets Ändi vo dä Gschicht. 

Er häts verdient. 

Beidi sind über sich usä gwachsä a denä zwei Täg. 

No en Blick uf  dä NEU  mit em Kolin. 

Passed guet zäme poschtürlich. 

Ich verlah d Arena

Ich bi voll vo Idrück. Bilderfätze ziend a mer verbi. 

D Welle Jeäh.  Jeäh. Jeäh

Sagmählfontäne, 

Händedrück

Zwilchhose

Siegerfüscht

Ich bi fascht in Trance

Da rüefts „Hey Franziska, nimmsch no es Raclette?“ Min Nochber Alois vo Walchwil. 

„Eidechsli Wii hätts aber keine meh.“

„Macht nüüt. Eifach nur zfriede.“

DANKE AN ALLI

DIÄ

FÜR DAS

FÄSCHT 

I D HOSE 

GSCHTIGE SIND

GROSSARTIG!!!